... ياللى فتحت البتاع ...,,, فتحك على مقفول

السلام عليكم ورحمة الله وبركاته...ازيكم يا شباب ؟؟انا حبيت اجبلك حاجة جديدة انهارده دمها خفيف .هى عبارة عن قصيدة مبنيه على كلمة ..الكلمة دى اسمها"بتاع" وانا بترك المجال لكل اللى يقراها انه يتخيل البتاع ده يطلع ايه بالظبط.انا لما قراتها عرفت ان البتاع ده ممكن يكون انا وانت والجامعة والنادى وحاجات كتير جميلة وهى فعلا تعبير صادق عن حاجات كتير من حولينا محدش بيديها اهتمام وربما شاعر العامية الكبير/احمد فؤاد نجم وكانه اخدنا من ادينا وورانا البتاع ده يطلع ايه..بجد اقرؤوها وقولولى ايه رايكم فيها....
.
يا للي فتحت البتاع
فتحك على مقفول
لأن أصل البتاع
واصل على موصول
فأى شئ في البتاع
الناس تشوف على طول
والناس تموت في البتاع
فيبقي مين مسؤول ؟
وإزاي حتفتح بتاع
في وسط ناس بتقول
بأن هذا البتاع
جاب الخراب مشمول
لأنه حتة بتاع
جاهل
غبي
مخبول
أمر بفتح البتاع
لأنه
كان مسطول !
***
وبعد فتح البتاع
جابوا الهوا المنقول
نكس عشوش البتاع
وهد كل أصول
وفات في غيط البتاع
قام سمم المحصول
وخلا لون البتاع
أصفر
حزين
مهزول
وساد قانون البتاع
ولا عله ولا معلول
فالقاضي بتع البتاع
فالحق ع المقتول
والجهل زاد في البتاع
ولا مقري
ولا منقول
والخوف
سرح في البتاع
خلا الديابه تصول
ويبقي البتاع في البتاع
والناس صايبها ذهول
وأن حد قال دا البتاع
يقولوا له
مش معقول
***
وناس تعيش بالبتاع
وناس تموت بالفول
وناس تنام ع البتاع
وناس تنام كشكول
آدي اللي جابه البتاع
جاب الخراب بالطول
لأنه حتة بتاع
مخلب
لراس الغول
باع البتاع بالبتاع
وعشان يعيش على طول
عين حرس بالبتاع
وبرضه مات مقتول